ਸੰਸਦ ਵਿੱਚ ਔਰਤਾਂ ਦੇ ਰਾਖਵਾਂਕਰਨ ਬਿਲ ਦਾ ਸਮਰਥਨ ਕਰਨ ਵਾਲੀਆਂ ਮੁੱਖ ਸਿਆਸੀ ਪਾਰਟੀਆਂ ਤੇਲੰਗਾਨਾ ਵਿਧਾਨ ਸਭਾ ਚੋਣਾਂ ਵਿਚ ਔਰਤਾਂ ਨੂੰ ਟਿਕਟ ਦੇਣ ਦੇ ਮਾਮਲੇ ਵਿੱਚ ਪਿੱਛੇ ਹੱਟ ਗਈਆਂ ਹਨ। ਕਾਂਗਰਸ ਦੇ 100 ਉਮੀਦਵਾਰਾਂ 'ਚ ਸਿਰਫ 11 ਔਰਤਾਂ ਸ਼ਾਮਲ ਹਨ ਜਦਕਿ ਤੇਲੰਗਾਨਾ ਰਾਸ਼ਟਰ ਕਮੇਟੀ ਨੇ ਸਿਰਫ ਚਾਰ ਔਰਤਾਂ ਨੂੰ ਮੌਕਾ ਦਿੱਤਾ ਹੈ। 2014 ਦੀਆਂ ਚੋਣਾਂ ਵਿੱਚ, ਟੀ ਆਰ ਐਸ ਨੇ 6 ਔਰਤਾਂ ਨੂੰ ਟਿਕਟਾਂ ਦਿੱਤੀਆਂ ਸਨ।
ਭਾਜਪਾ ਨੇ 14 ਮਹਿਲਾ ਉਮੀਦਵਾਰਾਂ ਨੂੰ ਮੈਦਾਨ ਵਿਚ ਉਤਾਰਿਆ ਹੈ ਜਦਕਿ ਏ.ਆਈ.ਐੱਮ.ਐੱਸ ਨੇ ਹੈਦਰਾਬਾਦ ਵਿੱਚ 8 ਸੀਟਾਂ 'ਤੇ ਕਿਸੇ ਵੀ ਮਹਿਲਾ ਉਮੀਦਵਾਰ ਨੂੰ ਟਿਕਟ ਨਹੀਂ ਦਿੱਤੀ ਹੈ। ਖੱਬੇ ਪੱਖਈ ਮੋਰਚੇ ਨੇ10 ਔਰਤਾਂ ਨੂੰ ਟਿਕਟ ਦਿੱਤੀ ਹੈ, ਜਿਨ੍ਹਾਂ ਵਿੱਚ ਇੱਕ ਲੇਸਬੀਅਨ ਵੀ ਸ਼ਾਮਲ ਹੈ।
ਔਰਤਾਂ ਨੂੰ ਟਿਕਟ ਦੇ ਮੁੱਦੇ 'ਤੇ ਆਪਣਾ ਪੱਖ ਸਪੱਸ਼ਟ ਕਰਦੇ ਹੋਏ, ਕਾਂਗਰਸ ਦੇ ਸਟਾਰ ਪ੍ਰਚਾਰਕ ਖੁਸ਼ਬਾਬੂ ਸੁੰਦਰ ਨੇ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਸੰਸਦ ਵਿੱਚ ਮਹਿਲਾ ਰਿਜ਼ਰਵੇਸ਼ਨ ਬਿਲ ਲਿਆਉਣ ਵਾਲੀ ਪਹਿਲੀ ਪਾਰਟੀ ਹੈ ਤੇ ਸੱਤਾਧਾਰੀ ਰਾਜਗ ਸਰਕਾਰ ਦਾ ਲੋਕ ਸਭਾ ਵਿੱਚ ਇਹ ਬਿੱਲ ਪਾਸ ਕਰਨ ਦਾ ਕੋਈ ਇਰਾਦਾ ਨਹੀਂ ਹੈ। ਉਸੇ ਸਮੇਂ ਤੇਲੰਗਾਨਾ ਭਾਜਪਾ ਦੇ ਮੁੱਖ ਬੁਲਾਰੇ ਨੇ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਸੀਟਾਂ ਦੀ ਵੰਡ ਵਿੱਚ ਸਮਾਜਿਕ ਸੰਤੁਲਨ ਨੂੰ ਧਿਆਨ ਵਿੱਚ ਰੱਖਦੀ ਹੈ।
ਤੇਲੰਗਾਨਾ ਵਿੱਚ ਤੇਲਗੂ ਦੇਸ਼ਮ ਪਾਰਟੀ (ਟੀ.ਡੀ.ਪੀ.) ਜੋ ਕਾਂਗਰਸ ਨਾਲ ਗੱਠਜੋੜ ਵਿੱਚ ਹੈ, ਨੇ ਆਪਣੇ ਖਾਤੇ ਦੀਆਂ 14 ਸੀਟਾਂ ਵਿੱਚੋਂ ਇੱਕ ਮਹਿਲਾ ਉਮੀਦਵਾਰ ਨੂੰ ਮੈਦਾਨ ਵਿੱਚ ਉਤਾਰਿਆ ਹੈ। ਇਸ ਇੱਕ ਸੀਟ ਉੱਤੇ ਮੁੱਖ ਮੰਤਰੀ ਤੇ ਟੀਡੀਪੀ ਮੁਖੀ ਚੰਦਰਬਾਬੂ ਨਾਇਡੂ ਦੀ ਧੀ ਸੁਹਾਸ਼ੀਨੀ ਚੋਣਾਂ ਲੜ ਰਹੀ ਹੈ।
