ਚੀਨ ਤੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਕੋਰੋਨਾ ਵਾਇਰਸ ਨਾਲ ਸਭ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਤ ਉਸ ਦੇ ਵੁਹਾਨ ਸ਼ਹਿਰ ਲਈ ਭਾਰਤ ਸੈਨਿਕ ਟ੍ਰਾਂਸਪੋਰਟ ਜਹਾਜ਼ ਰਾਹੀਂ 26 ਫਰਵਰੀ ਨੂੰ ਰਾਹਤ ਸਮੱਗਰੀ ਭੇਜੇਗਾ ਅਤੇ ਇਸੇ ਜਹਾਜ਼ ਨਾਲ ਉਥੇ ਫਸੇ ਭਾਰਤੀਆਂ ਨੂੰ ਵਾਪਸ ਲਿਆਂਦਾ ਜਾਵੇਗਾ। ਸਿਹਤ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
ਮੰਤਰਾਲੇ ਨੇ ਇਕ ਬਿਆਨ ਵਿੱਚ ਕਿਹਾ ਕਿ ਵਿਦੇਸ਼ ਮੰਤਰਾਲੇ ਵੱਲੋਂ ਇਹ ਸੂਚਿਤ ਕੀਤਾ ਗਿਆ ਹੈ ਕਿ ਹਵਾਈ ਸੈਨਾ ਦੇ ਇਕ ਜਹਾਜ਼ ਦੀ 26 ਫਰਵਰੀ ਨੂੰ ਵੁਹਾਨ ਲਈ ਉਡਾਣ ਭਰਨ ਦੀ ਯੋਜਨਾ ਹੈ ਅਤੇ ਉਥੋਂ ਇਹ ਜਹਾਜ਼ 27 ਫਰਵਰੀ ਨੂੰ ਭਾਰਤੀਆਂ ਨੂੰ ਲੈ ਕੇ ਵਾਪਸ ਪਰਤੇਗਾ। ਸਿਹਤ ਮੰਤਰਾਲੇ ਦੇ ਇਕ ਅਧਿਕਾਰੀ ਦੇ ਅਨੁਸਾਰ, ਚੀਨ ਨੇ ਹੁਣ ਭਾਰਤੀ ਸੈਨਿਕ ਟ੍ਰਾਂਸਪੋਰਟ ਜਹਾਜ਼ਾਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।
ਇਸ ਤੋਂ ਪਹਿਲਾਂ ਅਧਿਕਾਰਤ ਸੂਤਰਾਂ ਨੇ ਕਿਹਾ ਸੀ ਕਿ ਗੁਆਂਢੀ ਦੇਸ਼ ਸੀ -17 ਮਿਲਟਰੀ ਟਰਾਂਸਪੋਰਟ ਜਹਾਜ਼ਾਂ ਦੀ ਉਡਾਣ ਨੂੰ ਪ੍ਰਵਾਨਗੀ ਦੇਣ ਵਿੱਚ ਦੇਰੀ ਕਰ ਰਿਹਾ ਹੈ। ਇਹ ਜਹਾਜ਼ 20 ਫਰਵਰੀ ਨੂੰ ਬੀਜਿੰਗ ਦੇ ਰਸਤੇ ਵੁਹਾਨ ਜਾਣਾ ਸੀ। ਹਾਲਾਂਕਿ ਚੀਨ ਨੇ ਆਪਣੇ ਨਾਗਰਿਕਾਂ ਨੂੰ ਬਾਹਰ ਕੱਢਣ ਲਈ ਦੂਜੇ ਦੇਸ਼ਾਂ ਨੂੰ ਉੱਡਣ ਦੀ ਆਗਿਆ ਦਿੱਤੀ ਸੀ।
ਅਧਿਕਾਰਤ ਸੂਤਰਾਂ ਨੇ ਕਿਹਾ ਕਿ ਜਾਪਾਨ, ਯੂਕਰੇਨ ਅਤੇ ਫਰਾਂਸ ਨੂੰ 16 ਤੋਂ 20 ਫਰਵਰੀ ਦਰਮਿਆਨ ਉਡਾਣਾਂ ਚਲਾਉਣ ਦੀ ਆਗਿਆ ਸੀ ਪਰ ਭਾਰਤ ਦੀ ਬੇਨਤੀ ਮਨਜ਼ੂਰ ਨਹੀਂ ਕੀਤੀ ਗਈ। ਜਦੋਂ ਚੀਨੀ ਦੂਤਘਰ ਦੇ ਇੱਕ ਬੁਲਾਰੇ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਭਾਰਤੀ ਜਹਾਜ਼ਾਂ ਨੂੰ ਵੁਹਾਨ ਪਹੁੰਚਣ ਦੀ ਆਗਿਆ ਦੇਣ ਵਿੱਚ ਜਾਣ ਬੁੱਝ ਕੇ ਕੋਈ ਦੇਰੀ ਨਹੀਂ ਕੀਤੀ ਗਈ। ਇਹ ਜਹਾਜ਼ ਆਪਣੇ ਨਾਲ ਵੱਡੀ ਮਾਤਰਾ ਵਿੱਚ ਡਾਕਟਰੀ ਸਮਾਨ ਦੀ ਸਪਲਾਈ ਲੈ ਕੇ ਜਾਵੇਗਾ ਅਤੇ ਉਥੋਂ ਵਾਪਸ ਭਾਰਤ ਪਰਤੇਗਾ।
