ਅਗਲੀ ਕਹਾਣੀ

class="fa fa-bell">ਬ੍ਰੇਕਿੰਗ:

ਲੌਕਡਾਊਨ 4.0 'ਚ ਰਾਜ ਸਰਕਾਰਾਂ ਲੈ ਸਕਣਗੀਆਂ ਆਮ ਗਤੀਵਿਧੀਆਂ ਬਾਰੇ ਵਧੇਰੇ ਫ਼ੈਸਲੇ

ਅੰਮ੍ਰਿਤਸਰ 'ਚ ਆਮ ਗਤੀਵਿਧੀਆਂ ਹੁਣ ਹੌਲੀ–ਹੌਲੀ ਮੁੜ ਸ਼ੁਰੂ ਹੋਣ ਲੱਗੀਆਂ ਹਨ। ਤਸਵੀਰ: ਸਮੀਰ ਸਹਿਗਲ, ਹਿੰਦੁਸਤਾਨ ਟਾਈਮਜ਼

ਅੰਮ੍ਰਿਤਸਰ 'ਚ ਆਮ ਗਤੀਵਿਧੀਆਂ ਹੁਣ ਹੌਲੀ–ਹੌਲੀ ਮੁੜ ਸ਼ੁਰੂ ਹੋਣ ਲੱਗੀਆਂ ਹਨ। ਤਸਵੀਰ: ਸਮੀਰ ਸਹਿਗਲ, ਹਿੰਦੁਸਤਾਨ ਟਾਈਮਜ਼

 

 

ਲੌਕਡਾਊਨ 4.0 ਦੌਰਾਨ ਕੇਂਦਰ ਸਰਕਾਰ ਨੇ ਕੋਰੋਨਾ ਕੇਸਾਂ ਦੀ ਤਾਜ਼ਾ ਸਥਿਤੀ ਅਤੇ ਸਥਾਨਕ ਹਾਲਤ ਬਾਰੇ ਫ਼ੈਸਲਾ ਲੈਣ ਦੇ ਵਧੇਰੇ ਅਧਿਕਾਰ ਰਾਜਾਂ ਨੂੰ ਸੌਂਪ ਦਿੱਤੇ ਹਨ। ਹੁਣ ਨਿਯਮ ਤੈਅ ਕਰਨ ਦੀ ਜ਼ਿਆਦਾਤਰ ਜ਼ਿੰਮੇਵਾਰੀ ਰਾਜ ਸਰਕਾਰਾਂ ਉੱਤੇ ਆਣ ਪਈ ਹੈ ਪਰ ਰਾਜ ਸਰਕਾਰਾਂ ਕੇਂਦਰ ਵੱਲੋਂ ਜਾਰੀ ਹਦਾਇਤਾਂ ਦੇ ਘੇਰੇ ਤੋਂ ਬਾਹਰ ਵੀ ਨਹੀਂ ਜਾ ਸਕਣਗੇ। ਹੁਣ ਜਿਵੇਂ ਪੰਜਾਬ ਸਰਕਾਰ ਨੇ ਕੱਲ੍ਹ ਐਤਵਾਰ ਦੇਰ ਸ਼ਾਮੀਂ ਜਿਹੜੀਆਂ ਹਦਾਇਤਾਂ ਜਾਰੀ ਕੀਤੀਆਂ ਸਨ, ਉਹ ਜ਼ਿਆਦਾਤਰ ਕੇਂਦਰ ਦੀਆਂ ਹੇਠ ਲਿਖੀਆਂ ਹਦਾਇਤਾਂ ਉੱਤੇ ਹੀ ਆਧਾਰਤ ਹਨ।

 

 

24 ਮਾਰਚ, 2020 ਤੋਂ ਲਾਗੂ ਲੌਕਡਾਊਨ ਉਪਾਵਾਂ ਨੇ ਕੋਵਿਡ–19 ਦੇ ਫੈਲਣ ਤੋਂ ਰੋਕਣ ਵਿੱਚ ਬਹੁਤ ਜ਼ਿਆਦਾ ਮਦਦ ਕੀਤੀ ਹੈ। ਇਸੇ ਲਈ ਹੁਣ ਲੌਕਡਾਊਨ ਨੂੰ 31 ਮਈ, 2020 ਤੱਕ ਹੋਰ ਅੱਗੇ ਵਧਾਉਣ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਗ੍ਰਹਿ ਮੰਤਰਾਲੇ (ਐੱਮਐੱਚਏ – MHA), ਭਾਰਤ ਸਰਕਾਰ (ਜੀਓਆਈ – GoI) ਨੇ ਅੱਜ ਇਸ ਸਬੰਧੀ ‘ਆਫ਼ਤ ਪ੍ਰਬੰਧ (ਡੀਐੱਮ – DM) ਕਾਨੂੰਨ, 2005’ ਅਧੀਨ ਇੱਕ ਹੁਕਮ ਜਾਰੀ ਕੀਤਾ ਹੈ। ਨਵੇਂ ਦਿਸ਼ਾ–ਨਿਰਦੇਸ਼ਾਂ ਦੀਆਂ ਪ੍ਰਮੁੱਖ ਵਿਸ਼ੇਸ਼ਤਾਵਾਂ ਨਿਮਨਲਿਖਤ ਅਨੁਸਾਰ ਹਨ:

 

 

ਰਾਜ ਲੈਣਗੇ ਵਿਭਿੰਨ ਜ਼ੋਨਜ਼ ਬਾਰੇ ਫ਼ੇਸਲਾ

ਨਵੇਂ ਦਿਸ਼ਾ–ਨਿਰਦੇਸ਼ਾਂ ਅਧੀਨ, ਰੈੱਡ, ਗ੍ਰੀਨ ਤੇ ਆਰੈਂਜ ਜ਼ੋਨਜ਼ ਦੀ ਹੱਦਬੰਦੀ ਹੁਣ ਰਾਜ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ (ਯੂਟੀਜ਼ – UTs) ਖੁਦ ਕਰਨਗੇ ਤੇ ਇਸ ਲਈ ਉਹ ਕੇਂਦਰੀ ਸਿਹਤ ਮੰਤਰਾਲੇ ਵੱਲੋਂ ਤੈਅ ਮਾਪਦੰਡਾਂ ਦਾ ਪੂਰਾ ਖ਼ਿਆਲ ਰੱਖਣਗੇ। ਇਹ ਜ਼ੋਨਜ਼ ਕੋਈ ਇੱਕ ਜ਼ਿਲ੍ਹਾ ਜਾਂ ਇੱਕ ਨਗਰ ਨਿਗਮ / ਮਿਉਂਸਪੈਲਿਟੀ ਜਾਂ ਇਸ ਤੋਂ ਵੀ ਛੋਟੀ ਕੋਈ ਪ੍ਰਸ਼ਾਸਕੀ ਇਕਾਈ  ਜਿਵੇਂ ਸਬ–ਡਿਵੀਜ਼ਨਾਂ ਆਦਿ ਹੋ ਸਕਦੇ ਹਨ, ਇਸ ਬਾਰੇ ਫ਼ੈਸਲਾ ਰਾਜਾਂ ਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੂੰ ਹੀ ਲੈਣਾ ਹੋਵੇਗਾ।

 

 

ਸਥਾਨਕ ਅਧਿਕਾਰੀਆਂ ਵੱਲੋਂ ਰੈੱਡ ਅਤੇ ਆਰੈਂਜ ਜ਼ੋਨਜ਼ ਦੇ ਅੰਦਰ ਅੱਗੇ ਕੰਟੇਨਮੈਂਟ ਅਤੇ ਬਫ਼ਰ ਜ਼ੋਨਜ਼ ਦੀ ਹੱਦਬੰਦੀ ਕੀਤੀ ਜਾਵੇਗੀ ਤੇ ਇਸ ਲਈ ਵੀ ਉਹ ਕੇਂਦਰੀ ਸਿਹਤ ਮੰਤਰਾਲੇ ਦੇ ਦਿਸ਼ਾ–ਨਿਰਦੇਸ਼ਾਂ ਨੂੰ ਵਿਚਾਰ–ਗੋਚਰੇ ਰੱਖਣਗੇ।

 

 

ਕੰਟੇਨਮੈਂਟ ਜ਼ੋਨਜ਼ ਦੇ ਅੰਦਰ, ਸਿਰਫ਼ ਜ਼ਰੂਰੀ ਗਤੀਵਿਧੀਆਂ ਦੀ ਹੀ ਇਜਾਜ਼ਤ ਦਿੱਤੀ ਜਾਵੇਗੀ। ਨਿਰਧਾਰਤ ਘੇਰੇ ਅੰਦਰ ਸਖ਼ਤ ਕੰਟਰੋਲ ਕਾਇਮ ਰੱਖਿਆ ਜਾਵੇਗਾ ਅਤੇ ਉੱਥੇ ਲੋਕਾਂ ਦੀ ਕਿਸੇ ਤਰ੍ਹਾਂ ਦੀ ਆਵਾਜਾਈ ਦੀ ਇਜਾਜ਼ਤ ਨਹੀਂ ਹੋਵੇਗੀ, ਸਿਰਫ਼ ਕਿਸੇ ਤਰ੍ਹਾਂ ਦੀਆਂ ਮੈਡੀਕਲ ਐਮਰਜੈਂਸੀਆਂ ਤੇ ਜ਼ਰੂਰੀ ਵਸਤਾਂ ਤੇ ਸੇਵਾਵਾਂ ਦੀ ਸਪਲਾਈ ਬਰਕਰਾਰ ਰੱਖਣ ਦੀ ਹੀ ਇਜਾਜ਼ਤ ਹੋਵੇਗੀ। ਬਫ਼ਰ ਜ਼ੋਨਜ਼ ਦਰਅਸਲ ਹਰੇਕ ਕੰਟੇਨਮੈਂਟ ਜ਼ੋਨ ਦੇ ਨਾਲ ਲੱਗਦੇ ਇਲਾਕੇ ਹੁੰਦੇ ਹਨ, ਜਿੱਥੇ ਨਵੇਂ ਕੇਸ ਆਉਣ ਦੀ ਸੰਭਾਵਨਾ ਵਧੇਰੇ ਹੁੰਦੀ ਹੈ। ਬਫ਼ਰ ਜ਼ੋਨਜ਼ ਵਿੱਚ, ਵਧੇਰੇ ਸਾਵਧਾਨੀਆਂ ਰੱਖਣ ਦੀ ਲੋੜ ਹੁੰਦੀ ਹੈ।

 

 

ਇਨ੍ਹਾਂ ਗਤੀਵਿਧੀਆਂ ’ਤੇ ਪੂਰੇ ਦੇਸ਼ ਵਿੱਚ ਪਾਬੰਦੀ ਰਹੇਗੀ

ਕੁਝ ਸੀਮਤ ਗਿਣਤੀ ’ਚ ਗਤੀਵਿਧੀਆਂ ਉੱਤੇ ਪੂਰੇ ਦੇਸ਼ ਵਿੱਚ ਪਾਬੰਦੀ ਜਾਰੀ ਰਹੇਗੀ। ਇਨ੍ਹਾਂ ’ਚ ਇਹ ਸ਼ਾਮਲ ਹਨ

  • ਯਾਤਰੀਆਂ ਲਈ ਸਾਰੀਆਂ ਘਰੇਲੂ ਤੇ ਕੌਮਾਂਤਰੀ ਹਵਾਈ ਯਾਤਰਾਵਾਂ, ਸਿਰਫ਼ ਘਰੇਲੂ (ਦੇਸ਼ ਅੰਦਰ) ਮੈਡੀਕਲ ਸੇਵਾਵਾਂ, ਘਰੇਲੂ ਏਅਰ ਐਂਬੂਲੈਂਸ ਅਤੇ ਸੁਰੱਖਿਆ ਉਦੇਸ਼ਾਂ ਲਈ ਜਾਂ ਕੇਂਦਰੀ ਗ੍ਰਹਿ ਮੰਤਰਾਲੇ ਵੱਲੋਂ ਪ੍ਰਵਾਨਿਤ ਉਦੇਸ਼ਾਂ ਨੂੰ ਛੱਡ ਕੇ;
  • ਮੈਟਰੋ ਰੇਲ ਸੇਵਾਵਾਂ;
  • ਸਕੂਲ, ਕਾਲਜ, ਵਿਦਿਅਕ ਤੇ ਸਿਖਲਾਈ / ਕੋਚਿੰਗ ਸੰਸਥਾਨਾਂ ਦਾ ਖੋਲ੍ਹਣਾ;
  • ਹੋਟਲ, ਰੈਸਟੋਰੈਂਟਸ ਤੇ ਪ੍ਰਾਹੁਣਚਾਰੀ ਦੀਆਂ ਹੋਰ ਸੇਵਾਵਾਂ, ਬੱਸ ਡੀਪੂਆਂ, ਰੇਲਵੇ ਸਟੇਸ਼ਨਾਂ ਅਤੇ ਹਵਾਈ ਅੱਡਿਆਂ ਦੀਆਂ ਕੈਂਟੀਨਾਂ ਦੇ ਸੰਚਾਲਨ ਨੂੰ ਛੱਡ ਕੇ;
  • ਵੱਡੇ ਜਨਤਕ ਇਕੱਠਾਂ ਵਾਲੇ ਸਥਾਨ ਜਿਵੇਂ ਸਿਨੇਮਾਘਰ, ਸ਼ਾਪਿੰਗ ਮਾਲਜ਼, ਜਿਮਨੇਜ਼ੀਅਮਜ਼, ਮਨੋਰੰਜਨ ਪਾਰਕ ਆਦਿ;
  • ਸਮਾਜਕ, ਸਿਆਸੀ, ਸਭਿਆਚਾਰਕ ਤੇ ਹੋਰ ਅਜਿਹੇ ਇਕੱਠ ਤੇ ਹੋਰ ਵੱਡੇ ਇਕੱਠ ਅਤੇ ਜਨਤਾ ਲਈ ਧਾਰਮਿਕ ਸਥਾਨਾਂ/ਪੂਜਾ ਜਾਂ ਅਰਦਾਸ ਜਾਂ ਦੁਆ–ਬੰਦਗੀ ਵਾਲੇ ਸਥਾਨਾਂ ਤੱਕ ਪਹੁੰਚ।

 

ਉਂਝ, ਆਨਲਾਈਨ / ਡਿਸਟੈਂਸ ਲਰਨਿੰਗ (ਦੂਰਵਰਤੀ ਸਿੱਖਿਆ) ਦੀ ਇਜਾਜ਼ਤ ਹੋਵੇਗੀ ਤੇ ਉਸ ਨੂੰ ਉਤਸ਼ਾਹਿਤ ਕੀਤਾ ਜਾਵੇਗਾ; ਅਤੇ ਰੈਸਟੋਰੈਂਟਸ ਖੋਲ੍ਹ ਕੇ ਉੱਥੇ ਰਸੋਈ ਘਰ ਵਿੱਚ ਕੰਮ ਕਰਨ ਦੀ ਇਜਾਜ਼ਤ ਹੋਵੇਗੀ ਪਰ ਉਹ ਸਿਰਫ਼ ਭੋਜਨ ਵਸਤਾਂ ਦੀ ਸਿਰਫ਼ ਘਰਾਂ ਵਿੱਚ ਡਿਲੀਵਰੀ ਲਈ ਹੋਵੇਗੀ।

 

ਖੇਡ ਗਤੀਵਿਧੀਆਂ ਦਾ ਖੋਲ੍ਹਣਾ

ਖੇਡ ਕੰਪਲੈਕਸਾਂ ਅਤੇ ਸਟੇਡੀਅਮਾਂ ਨੂੰ ਸਿਰਫ਼ ਖੇਡ ਗਤੀਵਿਧੀਆਂ ਦੀ ਇਜਾਜ਼ਤ ਹੋਵੇਗੀ। ਪਰ ਇਨ੍ਹਾਂ ਕੰਪਲੈਕਸਾਂ ਵਿੱਚ ਕਿਸੇ ਦਰਸ਼ਕ ਦੇ ਮੌਜੂਦ ਰਹਿਣ ਦੀ ਇਜਾਜ਼ਤ ਨਹੀਂ ਹੋਵੇਗੀ

 

 

ਪਾਬੰਦੀਆਂ ਨਾਲ ਗਤੀਵਿਧੀਆਂ ਦੀ ਇਜਾਜ਼ਤ

ਵਿਅਕਤੀਆਂ ਦੇ ਆਉਣ–ਜਾਣ ਦੀ ਸੁਵਿਧਾ ਲਈ ਆਵਾਜਾਈ ਦੇ ਵੱਖੋ–ਵੱਖਰੇ ਸਾਧਨ ਪਹਿਲਾਂ ਹੀ ਖੋਲ੍ਹ ਦਿੱਤੇ ਗਏ ਹਨ। ਰੇਲ–ਗੱਡੀਆਂ ਰਾਹੀਂ ਵਿਅਕਤੀਆਂ ਦੀ ਆਵਾਜਾਈ ਦੀ ਇਜਾਜ਼ਤ ਗ੍ਰਹਿ ਮੰਤਰਾਲੇ ਨੇ ਪਹਿਲਾਂ 11 ਮਈ, 2020 ਦੇ ਇੱਕ ਆਦੇਸ਼ ਰਾਹੀਂ ਦਿੱਤੀ ਸੀ। ਇਸ ਦੇ ਨਾਲ ਹੀ ਭਾਰਤ ਤੋਂ ਵਿਦੇਸ਼ੀ ਨਾਗਰਿਕਾਂ ਦੀ ਵਾਪਸੀ, ਵਿਦੇਸ਼ਾਂ ’ਚ ਫਸੇ ਭਾਰਤੀ ਨਾਗਰਿਕਾਂ ਦੀ ਵਾਪਸੀ, ਭਾਰਤੀ ਮੱਲਾਹਾਂ ਦੇ ਸਾਈਨ–ਔਨ ਅਤੇ ਸਾਈਨ–ਔਫ਼, ਅਤੇ ਫਸੇ ਵਿਅਕਤੀਆਂ ਦੀ ਬੱਸਾਂ ਤੇ ਰੇਲਾਂ ਦੁਆਰਾ ਆਂਤਰ–ਰਾਜ (ਇੰਟ੍ਰਾ–ਸਟੇਟ) ਅਤੇ ਅੰਤਰ–ਰਾਜ (ਇੰਟਰ–ਸਟੇਟ) ਦੀ ਆਵਾਜਾਈ ਦੀ ਇਜਾਜ਼ਤ ਰਹੇਗੀ।

 

 

ਵਾਹਨਾਂ ਤੇ ਬੱਸਾਂ ਦੀ ਅੰਤਰ–ਰਾਜੀ (ਇੰਟਰ–ਸਟੇਟ) ਆਵਾਜਾਈ ਦੀ ਵੀ ਸਬੰਧਤ ਰਾਜਾਂ / ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੀ ਆਪਸੀ ਸਹਿਮਤੀ ਨਾਲ ਇਜਾਜ਼ਤ ਰਹੇਗੀ। ਵਾਹਨਾਂ ਅਤੇ ਬੱਸਾਂ ਦੀ ਆਂਤਰ–ਰਾਜੀ (ਇੰਟ੍ਰਾ–ਸਟੇਟ) ਆਵਾਜਾਈ ਬਾਰੇ ਫ਼ੈਸਲਾ ਸਬੰਧਤ ਰਾਜਾਂ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਵੱਲੋਂ ਲਿਆ ਜਾ ਸਕਦਾ ਹੈ।

 

 

ਕੋਵਿਡ–19 ਪ੍ਰਬੰਧ ਲਈ ਕੌਮੀ ਦਿਸ਼ਾ–ਨਿਰਦੇਸ਼

ਇਨ੍ਹਾਂ ਹਦਾਇਤਾਂ ਵਿੱਚ ਕੋਵਿਡ–19 ਪ੍ਰਬੰਧ ਲਈ ਕੌਮੀ ਦਿਸ਼ਾ–ਨਿਰਦੇਸ਼ਾਂ ਦਾ ਵਰਣਨ ਹੈ, ਜੋ ਜਨਤਕ ਸਥਾਨਾਂ ਅਤੇ ਕੰਮਕਾਜ ਵਾਲੇ ਸਥਾਨਾਂ ਲਈ ਲਾਗੂ ਹੋਣਗੇ।

 

 

ਇਨ੍ਹਾਂ ਦਿਸ਼ਾ–ਨਿਰਦੇਸ਼ਾਂ ਅਧੀਨ, ਚਿਹਰਾ ਢਕਣ ਲਈ ਮਾਸਕ ਜਾਂ ਕਵਰ ਦੀ ਵਰਤੋਂ ਲਾਜ਼ਮੀ ਹੈ; ਥੁੱਕਣ ਉੱਤੇ ਜੁਰਮਾਨਾ ਹੋਵੇਗੀ ਤੇ ਇਸ ਬਾਰੇ ਸਬੰਧਤ ਰਾਜ/ਕੇਂਦਰ ਸ਼ਾਸਿਤ ਪ੍ਰਦੇਸ਼ ਦੀ ਸਥਾਨਕ ਅਥਾਰਟੀ ਵੱਲੋਂ ਆਪਣੇ ਕਾਨੂੰਨਾਂ, ਨਿਯਮਾਂ ਤੇ ਵਿਨਿਯਮਾਂ ਅਨੁਸਾਰ ਨਿਰਧਾਰਣ ਕੀਤਾ ਜਾ ਸਕਦਾ ਹੈ; ਅਤੇ ਜਨਤਕ ਥਾਵਾਂ ਅਤੇ ਟ੍ਰਾਂਸਪੋਰਟ ਵਿੱਚ ਸਾਰੇ ਵਿਅਕਤੀਆਂ ਵੱਲੋਂ ਸਮਾਜਕ–ਦੂਰੀ ਦੀ ਪਾਲਣਾ ਕੀਤੀ ਜਾਵੇਗੀ। ਵਿਆਹ ਨਾਲ ਸਬੰਧਤ ਕਿਸੇ ਇਕੱਠ ਵਿੱਚ 50 ਤੋਂ ਵੱਧ ਮਹਿਮਾਨ ਨਹੀਂ ਹੋਣਗੇ। ਜਨਾਜ਼ਿਆਂ / ਅੰਤਿਮ ਰਸਮਾਂ ਲਈ ਹਾਜ਼ਰ ਰਹਿਣ ਵਾਲੇ ਵਿਅਕਤੀਆਂ ਦੀ ਗਿਣਤੀ 20 ਰੰਖੀ ਗਈ ਹੈ। ਜਨਤਕ ਥਾਵਾਂ ਉੱਤੇ ਸ਼ਰਾਬ, ਪਾਨ, ਗੁਟਖਾ ਅਤੇ ਤਮਾਕੂ ਆਦਿ ਦੇ ਸੇਵਨ ਦੀ ਇਜਾਜ਼ਤ ਨਹੀਂ ਹੈ।

 

 

ਕੌਮੀ ਦਿਸ਼ਾ–ਨਿਰਦੇਸ਼ ਕੰਮ–ਕਾਜ ਵਾਲੇ ਸਥਾਨਾਂ ਲਈ ਵਧੀਕ ਆਵਸ਼ਕਤਾਵਾਂ/ਸ਼ਰਤਾਂ ਵੀ ਨਿਰਧਾਰਤ ਕਰਦੇ ਹਨ। ‘ਘਰ ਤੋਂ ਕੰਮ’ (ਡਬਲਿਊਐੱਫ਼ਐੱਚ – WfH) ਦੇ ਨਿਯਮ ਦੀ ਪਾਲਣਾ ਸੰਭਵ ਹੱਦ ਤੱਕ ਕਰਨੀ ਚਾਹੀਦੀ ਹੈ; ਅਤੇ ਸਾਰੇ ਦਫ਼ਤਰਾਂ ਅਤੇ ਹੋਰ ਸਥਾਵਨਾਵਾਂ ਦੇ ਸਬੰਧ ਵਿੱਚ ਕੰਮ ਦੇ ਬਦਲਵੇਂ ਘੰਟੇ ਅਪਨਾਉਣੇ ਚਾਹੀਦੇ ਹਨ। ਦਾਖ਼ਲ ਹੋਣ ਤੇ ਬਾਹਰ ਨਿੱਕਲਣ ਦੇ ਸਾਰੇ ਸਥਾਨਾਂ ਅਤੇ ਆਮ ਖੇਤਰਾਂ ’ਤੇ ਥਰਮਲ ਸਕੈਨਿੰਗ, ਹੱਥ ਧੋਣ ਤੇ ਸੈਨੀਟਾਈਜ਼ਰਜ਼ ਦਾ ਇੰਤਜ਼ਾਮ ਹੋਣਾ ਚਾਹੀਦਾ ਹੈ; ਅਤੇ ਕਾਰਜ–ਸਥਾਨਾਂ ਉੱਤੇ ਸਮਾਜਕ ਦੂਰੀ ਲਈ ਕਾਮਿਆਂ ਵਿਚਾਲੇ ਉਚਿਤ ਦੂਰੀ ਯਕੀਨੀ ਬਣਾ ਕੇ ਰੱਖਣ, ਸ਼ਿਫ਼ਟਾਂ ਵਿਚਾਲੇ ਉਚਿਤ ਫ਼ਰਕ ਰੱਖਣ, ਸਟਾਫ਼ ਦੇ ਦੁਪਹਿਰ ਦੇ ਖਾਣੇ ਦਾ ਸਮਾਂ ਵੱਖੋ–ਵੱਖਰਾ ਕਰਨ ਤੇ ਅਜਿਹੇ ਹੋਰ ਫ਼ੈਸਲੇ ਲੈਣ ਦੀ ਵੀ ਜ਼ਰੂਰਤ ਹੋਵੇਗੀ।

 

 

ਦੁਕਾਨਾਂ ਅਤੇ ਬਾਜ਼ਾਰਾਂ ਬਾਰੇ ਸ਼ਰਤਾਂ

ਸਥਾਨਕ ਅਧਿਕਾਰੀਆਂ ਨੂੰ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਦੁਕਾਨਾਂ ਅਤੇ ਬਾਜ਼ਾਰ ਵੱਖੋ–ਵੱਖਰੇ ਸਮਿਆਂ ਉੱਤੇ ਖੋਲ੍ਹੇ ਜਾਣ, ਤਾਂ ਜੋ ਸਮਾਜਕ–ਦੂਰੀ ਯਕੀਨੀ ਹੋ ਸਕੇ। ਸਾਰੀਆਂ ਦੁਕਾਨਾਂ ਨੂੰ ਗਾਹਕਾਂ ਵਿਚਾਲੇ ਛੇ ਫ਼ੁੱਟ ਦੀ ਦੂਰੀ (2 ਗਜ਼ ਦੀ ਦੂਰੀ) ਰੱਖਣੀ ਵੀ ਯਕੀਨੀ ਬਣਾਉਣੀ ਹੋਵੇਗੀ ਅਤੇ ਇੱਕ ਵਾਰੀ ਵਿੱਚ 5 ਵਿਅਕਤੀਆਂ ਤੋਂ ਵੱਧ ਦੀ ਇਜਾਜ਼ਤ ਵੀ ਨਹੀਂ ਦਿੱਤੀ ਜਾਵੇਗੀ।

 

 

ਰਾਤ ਦਾ ਕਰਫ਼ਿਊ

ਵਿਅਕਤੀਆਂ, ਸਾਰੀਆਂ ਗ਼ੈਰ–ਜ਼ਰੂਰੀ ਗਤੀਵਿਧੀਆਂ ਲਈ ਸ਼ਾਮੀਂ 7 ਵਜੇ ਤੋਂ ਸਵੇਰੇ 7 ਵਜੇ ਤੱਕ ਆਵਾਜਾਈ ਉੱਤੇ ਰੋਕ ਲਈ ਰਾਤ ਦਾ ਕਰਫ਼ਿਊ ਜਾਰੀ ਰਹੇਗਾ।

 

 

ਅਸੁਰੱਖਿਅਤ ਵਿਅਕਤੀਆਂ ਲਈ ਸੁਰੱਖਿਆ

ਅਸੁਰੱਖਿਅਤ ਵਿਅਕਤੀਆਂ ਭਾਵ 65 ਸਾਲ ਤੋਂ ਵੱਧ ਦੇ ਵਿਅਕਤੀਆਂ, ਪਹਿਲਾਂ ਤੋਂ ਕੁਝ ਰੋਗਾਂ ਦਾ ਸਾਹਮਣਾ ਕਰ ਰਹੇ ਵਿਅਕਤੀਆਂ, ਗਰਭਵਤੀ ਔਰਤਾਂ ਅਤੇ 10 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਘਰਾਂ ਅੰਦਰ ਹੀ ਰਹਿਣਾ ਹੋਵੇਗਾ, ਸਿਰਫ਼ ਕੁਝ ਜ਼ਰੂਰੀ ਆਵਸ਼ਕਤਾਵਾਂ ਤੇ ਸਿਹਤ ਉਦੇਸ਼ਾਂ ਦੀ ਪੂਰਤੀ ਲਈ ਉਹ ਕਿਤੇ ਜਾ ਸਕਣਗੇ।

 

 

ਕੁਝ ਸੀਮਤ ਗਿਣਤੀ ’ਚ ਪਾਬੰਦੀਸ਼ੁਦਾ ਗਤੀਵਿਧੀਆਂ ਨੂੰ ਛੱਡ ਕੇ ਹੋਰ ਸਾਰੀਆਂ ਗਤੀਵਿਧੀਆਂ ਦੀ ਇਜਾਜ਼ਤ ਰਹੇਗੀ

ਹੋਰ ਸਾਰੀਆਂ ਗਤੀਵਿਧੀਆਂ ਦੀ ਇਜਾਜ਼ਤ ਰਹੇਗੀ; ਸਿਰਫ਼ ਉਨ੍ਹਾਂ ਨੂੰ ਛੱਡ ਕੇ ਜਿਨ੍ਹਾਂ ਬਾਰੇ ਇਨ੍ਹਾਂ ਦਿਸ਼ਾ ਨਿਰਦੇਸ਼ਾਂ ਅਧੀਨ ਖਾਸ ਤੌਰ ਉੱਤੇ ਪਾਬੰਦੀ ਲਾਈ ਗਈ ਹੈ। ਪਰ ਕੰਟੇਨਮੈਂਟ ਜ਼ੋਨਜ਼ ਵਿੱਚ, ਸਿਰਫ਼ ਜ਼ਰੂਰੀ ਗਤੀਵਿਧੀਆਂ ਦੀ ਹੀ ਇਜਾਜ਼ਤ ਹੋਵੇਗੀ, ਜਿਵੇਂ ਕਿ ਪਹਿਲਾਂ ਵਰਨਣ ਕੀਤਾ ਗਿਆ ਹੈ।

 

 

ਵਿਭਿੰਨ ਜ਼ੋਨਜ਼ ਦੇ ਅੰਦਰ ਗਤੀਵਿਧੀਆਂ ਬਾਰੇ ਰਾਜ ਲੈਣਗੇ ਫ਼ੈਸਲੇ

ਰਾਜ / ਕੇਂਦਰ ਸ਼ਾਸਿਤ ਪ੍ਰਦੇਸ਼ ਸਥਿਤੀ ਦਾ ਆਪਣੇ ਵੱਲੋਂ ਮੁੱਲਾਂਕਣ ਕਰਨ ਦੇ ਆਧਾਰ ਉੱਤੇ, ਵਿਭਿੰਨ ਜ਼ੋਨਜ਼ ਵਿੱਚ ਹੋਰ ਗਤੀਵਿਧੀਆਂ ਨੂੰ ਰੋਕ ਸਕਦੇ ਹਨ ਜਾਂ ਜ਼ਰੂਰੀ ਸਮਝਣ ਮੁਤਾਬਕ ਅਜਿਹੀਆਂ ਪਾਬੰਦੀਆਂ ਲਾ ਸਕਦੇ ਹਨ।

 

 

ਆਰੋਗਯ–ਸੇਤੂ ਦੀ ਵਰਤੋਂ

ਆਰੋਗਯ–ਸੇਤੂ ਮੋਬਾਇਲ ਐਪਲੀਕੇਸ਼ਨ ਭਾਰਤ ਸਰਕਾਰ ਵੱਲੋਂ ਤਿਆਰ ਕੀਤਾ ਗਿਆ ਇੱਕ ਸ਼ਕਤੀਸ਼ਾਲੀ ਔਜ਼ਾਰ ਹੈ, ਜੋ ਕੋਵਿਡ–19 ਦੀ ਛੂਤ ਤੋਂ ਗ੍ਰਸਤ ਜਾਂ ਅਜਿਹੀ ਛੂਤ ਲੱਗਣ ਦੇ ਖ਼ਤਰੇ ਵਿੱਚ ਰਹਿ ਰਹੇ ਵਿਅਕਤੀਆਂ ਦੀ ਤੁਰੰਤ ਸ਼ਨਾਖ਼ਤ ਕਰਨ ਦੀ ਸੁਵਿਧਾ ਦਿੰਦਾ ਹੈ, ਇੰਝ ਉਹ ਵਿਅਕਤੀਆਂ ਤੇ ਭਾਈਚਾਰੇ ਲਈ ਇੱਕ ਢਾਲ ਵਜੋਂ ਕੰਮ ਕਰਦਾ ਹੈ। ਦਫ਼ਤਰਾਂ ਅਤੇ ਕਾਰਜ–ਸਥਾਨਾਂ ਉੱਤੇ ਸੁਰੱਖਿਆ ਯਕੀਨੀ ਬਣਾਉਣ ਲਈ ਰੋਜ਼ਗਾਰਦਾਤਿਆਂ ਨੂੰ ਹਰ ਤਰ੍ਹਾਂ ਦੇ ਜਤਨ ਕਰ ਕੇ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਸਾਰੇ ਮੁਲਾਜ਼ਮ ਆਪਣੇ ਅਨੁਰੂਪ ਮੋਬਾਇਲ ਫ਼ੋਨਜ਼ ਉੱਤੇ ਇਹ ਐਪਲੀਕੇਸ਼ਨ ਇੰਸਟਾਲ ਕਰ ਲੈਣ।

 

 

ਜ਼ਿਲ੍ਹਾ ਅਧਿਕਾਰੀਆਂ ਨੂੰ ਵੀ ਇਹ ਆਖਿਆ ਜਾਂਦਾ ਹੈ ਕਿ ਉਹ ਵਿਅਕਤੀਆਂ ਨੂੰ ਆਰੋਗਯ–ਸੇਤੂ ਐਪਲੀਕੇਸ਼ਨ ਆਪਣੇ ਅਨੁਰੂਪ ਮੋਬਾਇਲ ਫ਼ੋਨਜ਼ ਉੱਤੇ ਇੰਸਟਾਲ ਕਰਨ ਦੀ ਸਲਾਹ ਦੇਣ ਅਤੇ ਐਪ ਉੱਤੇ ਆਪਣੀ ਸਿਹਤ ਦੀ ਸਥਿਤੀ ਬਾਰੇ ਨਿਯਮਤ ਰੂਪ ਵਿੱਚ ਅਪਡੇਟ ਦੇਣ। ਇੰਝ ਖ਼ਤਰੇ ਵਿੱਚ ਰਹਿ ਰਹੇ ਵਿਅਕਤੀਆਂ ਨੂੰ ਸਮੇਂ–ਸਿਰ ਮੈਡੀਕਲ ਸਹਾਇਤਾ ਦੀ ਵਿਵਸਥਾ ਦੀ ਸੁਵਿਧਾ ਮਿਲ ਸਕੇਗੀ। ਰਾਜ / ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੀਆਂ ਸਰਕਾਰਾਂ ਨੂੰ ਲੌਕਡਾਊਨ ਦੇ ਦਿਸ਼ਾ–ਨਿਰਦੇਸ਼ਾਂ ਨੂੰ ਸਖ਼ਤੀ ਨਾਲ ਨਿਰੰਤਰ ਲਾਗੂ ਕਰਨਾ ਹੋਵੇਗਾ ਅਤੇ ਉਹ ਕਿਸੇ ਵੀ ਹਾਲਤ ਵਿੱਚ ਆਫ਼ਤ ਪ੍ਰਬੰਧ ਕਾਨੂੰਨ, 2005 ਅਧੀਨ ਜਾਰੀ ਇਨ੍ਹਾਂ ਦਿਸ਼ਾ–ਨਿਰਦੇਸ਼ਾਂ ਨੂੰ ਖ਼ਤਮ ਨਹੀਂ ਕਰਨਗੇ।

 

ਲੌਕਡਾਊਨ ਅੱਗੇ ਵਧਾਉਣ ਦੇ ਹੁਕਮ ਅਤੇ ਸੋਧੇ ਕੌਮੀ ਦਿਸ਼ਾ–ਨਿਰਦੇਸ਼ ਵੇਖਣ ਲਈ ਇੱਥੇ ਕਲਿੱਕ ਕਰੋ

  • Punjabi News ਨਾਲ ਜੁੜੀਆਂ ਹੋਈਆਂ ਹੋਰ ਖ਼ਬਰਾਂ ਦੀ ਜਾਣਕਾਰੀ ਲਈ ਸਾਡੇ ਨਾਲ ਅਤੇ ਤੇ ਜੁੜੋ.
  • Web Title:State Governments to take most of the decisions during Lockdown 4